البطولة المغربية تخسرات عليها فلوس كثيرة وجبنا الفار باش تنقص الأخطاء التحكيمية لكن وقع العكس، وكثرات الاحتجاجات ديال الفراقي وحتى واحد ما عاجبو الحال.
المصادر ديال “فلاش راديو” كشفات أن لقجع ما عاجبوش الحال وباغي يبدل مديرية التحكيم الي المدير ديالها هو يحيى حدقة لكن لحد الساعة باقي ما تاخدش القرار لي خاصو يكون شجاع لبزاف ديال المعطيات.
وزادت كشفات المصادر ديالنا لي متبعا الملف ديال التحكيم، والعهدة على الراوي، أن حدقة كيقول للناس المقربين منو، الى تحيد من مديرية التحكيم غادي يفركع الرمانة، والناس ديال كرة القدم عارفين هاد الشي، ودائما كيطرحوا سؤال لي مهم بزاف، واش كاين غير حدقة في البلاد لي يقدر يشد مديرية التحكيم، ولا بصاح داكشي لي كيتداول هو لي واقع.
