الفنان “فركوس” غَيْتْبَتْ حضورو فرمضان الجايّ بعمل درامي كوميدي

غيعرف رمضان الجايّ مشاركة الممثل عبد الله فركوس في مسلسل درامي كوميدي، اللي من المنتظر بداية تصوير الحلقات ديالو فاليامات الجايّ واللي كتشرف على إخراجو صفاء بركة، وداكشي بعد ما سالى من تصوير فيلمو التلفزي “شد ليمين”، اللي كان من إخراجو وإنتاجو لجانب لعب دور البطولة فيه.

وحسب مصادر مطّلعة، ذكرات باللّي أجواء تصوير هاد المسلسل اللي غيضرب موعد للعرض فالموسم الرمضاني الجايّ فشاشة القناة الأولى، غتبدا فالسيمانة اللّخرة من شهر غشت الحالي فكازا.

وزادت نفس المصادر أن هاد السّلسلة، مازال متحطّ ليها عنوان، “كتّكوّن من ثلاثين حلقة، وكدّور الأحداث ديالها فصبغة درامية وكوميدية، كيتطرّق لحياة 3 ديال العائلات بخلفيات اجتماعية، كلّ وحدة مختالفة على لاخرى، وكيتلاقاو في مواقف مشتاركة.

وكتعرف أحداث هاد المسلسل الاجتماعي، حسب نفس المصادر، قصص متنوّعة على الحب والهجرة والمصلحة، وتكرار الأحداث فجوج ديال الأزمنة متباعدة، حيث غتنطالق الأحداث من قصة حب مكملاتش بسباب البحث على عيشة أفضل، وتحقيق المصلحة الذاتية كان طاغي،والغرض هو تسوية الوضعي الاجتماعي”.

وكيشمل هاد المسلسل مجموعة من الممثلين، أهمّهم مونية لمكيمل، وزهور السليماني، فيصل عزيزي، حسناء الطمطاوي، وسحر الصديقي ، وعبد الصمد مفتاح الخير، عبد الرحيم المنياري وزيد وزيد…

وفي صدد أخر، وجّد عبد الله فركوس أخيرا فيلم بعنوان “شد ليمن” اللي تخصّص باش يدوز فشاشة “دوزام”، اللي كيعالج مجموعة من المواقف الاجتماعية في صبغة كوميدية مليئة بالإثارة والتشويق، حسب تصريح سابق للأبطال ديالو.

وكيشارك فهادالفيلم التلفزيوني، بجانب فركوس اللي كيشرف فيه كذلك على الإخراج والإنتاج، النّانة القديرة وفضيلة بنموسى،حاتم عبد الغفور، وعبد الصمد مفتاح الخير، وعمر العزوزي، وغيرهم.

وتذكر باللي عبد الله فركوس دخل أخيرا لمجالي الإخراج والإنتاج، بعدما جمع خبرة ميدانية كبيرة فالتمثيل بظهورو فبزّاف ديال الأعمال التلفزيونية من أشهرها “مول الهوندة”، و”كلّنا مغاربة”، و”الفرّوج”.

وكان فركوس شارك قبل شي شهورة في بطولة فيلم سينمائي بعنوان “البوز”، للمخرجة ديمنة بونعيلات، اللي كيجمع بين الكوميديا والدراما، وكيستهدف مواضيع كتّعلق بالمؤثّرين ديال “لسوشل ميديا”، اللي كيروّجو لمحتويات “بايخة” وما فايدة بوالو، ولكن هوما كيطلعو لساحة الأضواء وكتّعطاهم شهرة من “لا شيء” باش يولّيو مشاهير، زائد أنه حطّ ظاهرة “الاستغلال” فالساحة الفنية تحت المجهر.