عارفين أن الهزيمة القاسية اللي تلقّاها المنتخب النسوي لكرة القدم قدّام نظيره الألماني، خيّبات آمال بعض المغاربة اللي كانو تايقين فيهم، ومن الطبيعي أن فئة من رواد مواقع التواصل يتداولو آراء وتعليقات سلبية، لكن من جهة أخرى كاينين فئة كبيرة من المغاربة اللي كيساندوهم فالحلوة والمرّة بغض النظر على النتيجة.
في حين خرجوا اللّبؤات باعتذار للجماهير المغربية بسباب الهزيمة فالماتش اللول، وفنفس الوقت أكّدو على أنهم غايكونو في أتمّ الاستعداد وغيعطيو لراسهم التركيز الكلّي للماتشات الجايّين ضدّ كل من كوريا الجنوبية وكولومبيا، وبلا شك أنه بمساندة وتشجيع المغاربة لينا، غيكون عندنا دافع وحافز كبير باش نعطيو ما فجهدنا، حيتاش حنا محتاجين الدعم النفسي قبل كلشي.
وجا في تصريح بعض اللاعبات خلال الحصة التدريبية اليوم الخميس، حيث قالت نسرين الشاد: “كنستعدّوا للمقابلة الجايّة ضد “الشمشون الكوري” بكامل تركيزنا وعارفين المسؤولية اللي على العاتق ديالنا، وكنبغي نشكر الجماهير المغربية على الدعم ديالها والسند ديالها لينا فالماتش اللول، وحنا بحاجة ماسّة ليهم وغنتقاتلو على ودّهم باش نفوزو بالماتش الجاي”.
كيفما جا على لسان “أسية زهير” ، “أن المنتخب المغربي حاطّ كامل تركيزه على تصحيح مكامن الخلل ديالو وتعزيز نقاط القوة قبل ماتش كوريا الجنوبية”، وزادت ضافت: “حنا كنوجدو باش نكونو على كامل الاستعداد للماتش الجاي، وعندنا دابا حصة تدريبية اللي من خلالها كنحاولو نوقفو على نقاط القوة والخلل والضعف ديالنا ونخدمو على الحوايج اللي غينفعونا فالماتش الجاي، وحظوظنا مازال قائمة وغندافعو عليها حتال أخر رمق.
وأخيرا، طاقم “فلاش راديو” كيواكب حضور المنتخب النسوي في كأس العالم للسيدات (أستراليا..نيوزيلاندا) بشكل مستمّر ب”لايفات” على مواقع التواصل الاجتماعي..غتلقاو باقي التفاصيل في رابط الفيديو أسفله: