ارتجالية في تسيير جمعية سطايح بإقليم بولفاع التابعة لعمالة شتوكة أيت باعا،جعلت مع الساكنة تنتفض وكتطالب بالتغيير وانتخاب مكتب جديد قادر على تسيير شؤؤن الجمعية.
ساكنة سطايح عبرت عن الغضب وعدم الرضا ديالها، خاصة فيما كيتعلق بالشق ديال تدبير الماء، والفوضى والمحسوبية لي كيتعاملو بها أعضاء الجمعية مع الساكنة، “أنت والقيمة الاجتماعية ديالك” وإلى كنت من الأعيان وعندك وزن فالماء موجود بدون انقطاع، أما الموطن العادي فكيطلقو له الماء ساعة في الصباح وساعة بالليل.
الناس ديال الدوار، كيأكدوا بأن جمعية سطايح كيسيروها ناس ما قادرينش يتماشاو مع الرهانات ديال الساكنة، رغم بعض المجهودات التي تبقى ضئيلة بالنسبة للساكنة، لكن العديد من الأمور كتبقى متأخرة.
وأكد شخص من أبناء الدوار في اتصال هاتفي مع ” فلاش راديو” أن توزيع الماء لا يكون بطريقة عادلة، وكيطالبو السلطات باش تدخل وتوضع حد لهاد المشكل لي كيعانيو منو بسبب الطريقة ديال الجمعية في التعامل مع هدا الاشكال، وكيعتبرو الكيل بمكيالين وتفضيل البعض على الآخر غادي يخلق مشاكل كبيرة فالدوار، رغم أن الدوار يتوفر على ثلاثة ديال البيار وباستطاعتهم يفطيو الحاجيات ديال الدوار بدون انقطاع.
وتطالب الساكنة ديال سطايح الممثلين ديال السلطة المحلية باش تدخل وتدير بحث في الموضوع والوقوف على الخروقات ديال جمعية سطايح.