علّق المدرب الفرنسي “هيرفي رونار”، على عبور المنتخب المغربي لثمن نهائي مونديال السيدات 2023، وعبّر على الفرحة ديالو بتأهل المغرب، كيأكد أنهم فاجئوه بالنتائج اللي وصلو ليها.
وزاد ذكر في تصريح ل “ليكيب الفرنسية”.. “لاعبات المغرب بيّنو على تلاحم وصمود ماشي عادي. كنهنأ المدرب “رينالد بيدروس”، وفاش كنعرفو داكشي اللي حقّقو أسود الأطلس فمونديال 2022، فعلا داكشي واعر وجنوني، وشعور متميز بالنسبة ليا حيتاش دوّزت تمّاك 4 سنين”.
وفيما كيتعلّق بماتش المغرب وفرنسا الثلاثاء، قال رونار، حسب نفس المصدر ، أن داكشي كيتعتابر شي حاجة خاصة عندو، وزاد “إنما خاصّني نبقى بعيد على هاد الإطار، حنا (المنتخب الفرنسي) هنا باش نحقّقو نتائج واعرة، وكلّ ما يهمّ هو التركيز على هادشي، أما المشاعر والأحاسيس، غنخلّيها لراسي”.
وكمّل “المنتخب المغربي معندو ميخسر، وأي حاجة طرات ليه فكاس العالم فغتّعتابر إضافة ليه. وغيحاولو يطيّحو فرنسا فالمصيدة، ومنّساش أن التأهل ديالهم من مجموعة تقصاو فيها الماكينات الألمانية شي حاجة الماجيك ديال الكورة”.
