شعلات زيارة وزير الصحة والحماية الاجتماعية، خالد أيت الطالب لمستشفى الدريوش، ووصفها بـ”المسرحية” من طرف برلماني من الفريق الاستقلالي مواجهة بين نواب فرق الأغلبية والمعارضة.
ووصف البرلماني عن الفريق الاستقلالي، عبد المنعم الفتاحي، زيارة أيت الطالب لمستشفى الدريوش، بـ”المسرحية”، وزاد باللي هاد الصبيطار “مكانش محتاج لهاد الزيارة، حيتاش معندوش ميزانية تسيير ولا يستخلص الإتاوات، ومكيتوفرش على أطباء وممرضين”.
أضاف الفتاحي أنه “عوض هاد المسرحية، وتصويرها، كان خاصكم تعينو أطباء قبل فتح المستشفى، وماشي التقلاب على (البريز) واش خدام ولا لا، ونتوما كتعرفو باللي الصبيطار تفتاتح قبل الأوان ديالو وبلا ميزانية”.
من جيهتو، خاطب عبد الواحد الشافي عن فريق التجمع الوطني للأحرار، أيت الطالب بقوله: “كون كنتو كتسمعو لنواب الأمة ولملاحظاتهم سواء من الأغلبية والمعارضة كون ممشيتوش للدريوش”، وزاد ضاف أن وزير الصحة مكيجاوبش على الأسئلة الكتابية، وحتى إيلا رد كيصرح باللي الوضع الصحي مريح.
وضاف البرلماني التجمعي، باللي صبيطار الدريوش هو نموذج مصغر لداكشي اللي كايطرى في باقي مستشفيات المملكة، ونتيجة للوضع المؤلم والمزري للعرض الصحي، مستغرب من ازدواجية خطاب وزير الصحة، وقيامه بدور الحكومة داخل البرلمان، ودور المعارضة خارجه.
من جيهتو، قال البرلماني عن الفريق الاشتراكي – المعارضة الاتحادية، إن الزيارات الميدانية هي اللي فعالة، كيخاطب الوزير بقوله: “إيلا مبغاتش الأغلبية ديرو هاد الزيارات فحنا كنرحبو بيكم فالأقاليم للقيام بها والوقوف على معاناة المواطنين والواقع المعاش”.
وتابع بعزيز، باللي المعارضة الاتحادية مع الزيارات الميدانية حيتاش كتوقف على الاختلالات والواقع المعاش، كيضيف باللي “لسان حال الفيسبوك بعد زيارة مستشفى الدريوش هو القيام بزيارات ميدانية لكل المستشفيات”.
ورجع الفريق البرلماني للتجمع الوطني للأحرار، للتأكيد على أن الأغلبية البرلمانية تستحسن الزيارة اللي دارها أيت الطالب لمستشفى الدريوش، كيصيف باللي “الأغلبية البرلمانية كتحس بمآسي المغاربة وأهم محور فالبرنامج الحكومي كان هو الصحة والحماية الاجتماعية”.
وبالمقابل، خاطب وزير الصحة البرلماني عن فريق التجمع الوطني للأحرار عبد الواحد الشافي بقوله: “فين هي ازدواجية الخطاب، حنا كندويو على إصلاح وورش ملكي إصلاحي، وهناك ترسانة قانونية، وكان تماك مشكل في الدريش وقمت بالزيارة”.
وزاد أيت الطالب قائلا: “واش ضريتك إيلا مشيت، فين كاين الإشكال، هادا شغلي إيلا معجباتكش الزيارة ديالي شغلك هاداك”، كيضيف “فين كاين الإشكال إيلا درت زيارات ميدانية خاص تحاسبني إيلا مدرتش خدمتي داخل الغرفة”.
وقبل داكشي، خاطب وزير الصحة البرلماني الاستقلالي بقوله: “كنت نعيط ليك تجي تمثل معايا فديك التمثيلية”، كيوضح باللي مستشفى الدريوش منذ افتتاحها وتوفرات ليه 140 من الموارد البشرية باش يخدم، ومننساوش التجهيزات.
وضاف أيت الطالب، أنه يمكن الرجوع لمستندات المستشفى للتعرف على عدد من الخدمات والعمليات اللي كيقدمها المستشفى منذ افتتاحو، كيتسائل: “شكون دار دكشي واش الأشباح”، وفق تعبيره.
وشار إلى أنه متافق مع أنه كاين نقص فالخدمات المقدمة للساكنة، وعلى داكشي دار هاديك الزيارة لصبيطار الدريوش، كيبين أنه “تم توقيع اتفاقية وكان دعم بـ100 من الموارد البشرية في جميع التخصصات، وتم إجراء زيارة تفقدية للوقوف على شكايات الساكنة اللي كتقول باللي المستشفى مسدود”.
وزاد كيخاطب البرلماني الاستقلالي عبد المنعم الفتاحي بالقول: “واش نبقى ساكت، كتطلب مني القيام بزيارة ودبا طلع للكرما ونزل شكون قالها ليك”، كيضيف: “واش تتطلب مني نبقى نتفرج واش أنا كندير مسرحية”.