نفى بيدرو سانشيز، رئيس الحكومة الإسبانية، باش يكون التغيير في موقف إسبانيا بشأن قضية الصحراء المغربية ناتج على اختراق “البورطابل” ديالو ببرنامج “بيغاسوس” كيفما تروج ليه المعارضة، وشدد في مقابلة صحفية على أن داكشي لا أساس له من الصحة، وقال “مكيناش شي حاجة ضدي وأنا ماشي مثالي، لكن نظيف”.
واتّاهم بعض أحزاب المعارضة بترويج أخبار كتفيد بالعثور على معلومات ضدّو ف”بورطابلو”، واللي حطّات إسبانيا فموقف ضعف، وهو سبب تغيير الموقف بخصوص الصحراء.
وأكّد بيدرو سانشيز، باللي إسبانيا كتحتافظ “بنفس الموقف” بشأن الصحراء، وهو موقف “متوافق تمامًا” مع الأمم المتحدة، وهو نفس موقف الحلفاء الدوليين بحال ألمانيا وفرنسا وهولندا والولايات المتحدة.
وبخصوص مشكل الهجرة غير الشرعية، شار باللي المغرب ماشي دولة “منشأ” وأنه كيعاني منها كذلك. وشدّد على أن “المغرب كيعاني كذلك من هاد الهجرة غير النظامية اللي كتجي من الساحل في مالي، من مناطق غير مستقرة”. وقال أنه “باش يهدر الواحد على الهجرة مع المغرب، خاصك تحط راسك فبلاصتهم وتفهمها”.
