عرفات الأيام الفايتة الشكوى ديال عدد من المواطنين، من تغير طعم الما ديال الشريب ببني ملال، وكانو مواقع التواصل الاجتماعي هوما الباب الوحيد باش يوصلو شكاويهم للمسؤولين.
وسجلات الشكاوي ديال المواطنين، تغيّر طعم الما، حيث ولات كتخرج منو ريحة التراب، الحاجة اللي خلات البعض يضطر باش يشري المياه المعدنية.
ومن بين الأحياء، اللي تشكاو سكانها من وجود اختلالات في جودة الما ديال الشريب، الهدى أولاد عياد، منزه الأطلس، المسيرة 2، الشرايبي، جنان الطاهر وزيد وزيد…
وكيفما جا على لسان حنان أبو الفتح، مديرة الوكالة المستقلة الجماعية لتوزيع الماء والكهرباء بتادلة، لمصادر مقربة..أنها “متوصلات بحتى شي شكاية من طرف المواطنين فيما يتعلق بتغير طعم الما ديال الشريب”.
وزادت حنان أبو الفتح، باللي “لوكالة خدامة بشكل يومي لإجراء تحليلات على عينات من الما من طرف المختبر ومتسجل حتى تغيير”.
وبينات باللي “نتائج التحاليل خلصت بأن الما اللي كيوصل لديور المواطنين جاي من “عين أسردون” ولا سد بين الويدان سليم ومطابق لمعايير الجودة المعمول بيها على الصعيد الوطني”.
ومن جهة أخرى، نفى مصدر من داخل المكتب الوطني للكهرباء والماء الصالح للشرب ببني ملال، تغير جودة الماء، كيأكد أنه “كاينة مراقبة متواصلة للمياه”.
