مجموعة من الفنانين المغاربة أثاروا ضجة واسعة في مواقع التواصل الاجتماعي، بعد إصدارهم لألبومات وأعمال جديدة فالساحة الفنية بعد ما تبين باللي كترجع لأشخاص أخرين، بحيث ولات المسألة تابعاهم ،حيت متهمين بالسرقة وانتهاك حقوق المؤلف.
في حين الكثير من الفنّانة المغاربة طاحو مؤخرا فنفس المشكل، ومن بينهم الفنانة اللي اعتازلات الميدان بسمة بوسيل المهددة بالمتابعة القانونية بعد ما دارت “كوفر “للموسيقار أسامة الرحباني ،وبه تم حذف العمل من صفحتها الرسمية.
إضافة للفنان المغربي نعمان بلعياشي، واللي بدورو قام ب “ديو” مع الفنانة الشعبية “زينة الداودية”بحيث تحتم عليه يمسحو من منصة يوتيوب من بعد سيمانة فقط من إصدارو، بسباب تبليغ فنان أخر كيقول باللي مقطع من العمل كيرجع ليه ومسجل باسمو فالمغرب وفرنسا.
وأشار المنتج الفني ومدير اعمال مجموعة من الفنانين مفيد السباعي باللي مشاكل حقوق المؤلف مطروحة منذ مدة طويلة حيت الفنانين كيطيحو في مصيدة ملكية لحن ولا كلمات شي عمل، كيرجع لشخص أخر ومسجل بسميتو.
وزاد قال أنه من الممكن يكون الفنان غير مسؤول بطريقة غير مباشرة عن ذلك، حيتاش عندو فريق عمل كيتواصل معاه وكيطلب منو أغنية جديدة بنمط معين ولكن هو معارفش باللي ملكيتها كترجع لشخص أخر فاش كيطرحها على يوتيوب، وكيبان ديك الساعة مولاها الأصلي وكيطالب بحقوقو.
وضاف كيتحدث باللي الفنان فاللخر كيتحمل جزء من المسؤولية، فاش كيتوصل بقطعة اللي عليه وهو أنه يستفسر عليها مزيان، ويتأكد واش كترجع ملكيتها لشخص أخر ويكون حريصا قبل ما يقوم بإصدارها، باش يتفادى المتابعة القانونية كيتمنى باش يولّي مستقبلا صناع الأعمال على دراية تامة بهاد الأمور الخاصة بحقوق الملكية الفكرية، باش يتفاداو المشاكل.
