عرفات الليلة ديال البارح مصرع جوج ديال الأشخاص ديك الساعة وفبلاصتهم، على مستوى الطريق اللي كتجمع، بين أربعاء أولاد سعيد بإقليم سطات، والجماعة الحضرية جمعة أولاد عبو، التابعة نفوذيا لعمالة إقليم برشيد، وبالضبط على مستوى دوار الشلوخة، جماعة بن حمدون، قيادة أولاد عبو، متأثرين بإصابتهم الشديدة، من بعد “كسيدة” خطيرة.
ويذكر ن الحادثة طرات بعد إصطدام مجهد، طرى بين “أومبيلوص” تابعة لمصالح الجماعة الحضرية أولاد عبو، كانت جاية من المستشفى الجهوي الحسن الثاني بسطات، فطريقها لمهرجان موسم سيد السماحي البهالة، اللي تمت إقامته وتنظيمه، غير بعيد من الجماعة الحضرية جمعة أولاد عبو، وراكب فيها فارس “خيال”، جات فيه طلقة ديال البارود وسط الموسم، اللي تم إحياؤه لأول مرة في تاريخ المنطقة، و”موطور” كانو راكبين فيه 2 ديال الأشخاص، الشيء اللي أدى للوفاة ديالهم ديك الساعة، في حين تصاب الشيفور ديال “لومبيلونص” بجروح خفيفة، استوجبات النقل ديالو ديريكت لقسم المستعجلات، بالمستشفى الجهوي الحسن الثاني بسطات، باش يتلقى العلاجات والإسعافات الأولية اللازمة.
كيفما أن الشيفور ديال “لومبيلونص” كان غادي فالمسار ديالو الصحيح، حتى تفاجأ ب”كرويلة” مجرورة بواسطة دابة، كانت غادة فنفس الإتجاه بلا ضو، والضحيتين كاناو غادين فالإتجاه المعاكس، بلا أضواء أمامية ولا خلفية، بالطريق الثانوية الرابطة بين سطات، وجمعة أولاد عبو بإقليم برشيد، قبل ما ضربهم سيارة الإسعاف، اللي فقد الشيفور ديالها السيطرة عليها والتحكم فيها.
حتال ديك الوقت، تم إعلام مصالح الوقاية المدنية والسلطة المحلية، اللي بدورها التحقت عناصر منها لمكان الحادث، باش يقومو باللازم واتخاذ المتعين فيما يتعلق بالحادث، وتوجيه جثتي الضحيتين لمستودع حفظ الجثامين، بالمستشفى الجهوي نفسه، فيما فتحات مصالح الدرك الملكي بالمركز الترابي جمعة أولاد عبو، تحقيق فالكسيدة المأساوية المميتة، تحت إشراف النيابة العامة المختصة، لدى المحكمة الإبتدائية برشيد، لمعرفة ملابسات وأسباب الحادثة وتحديد المسؤوليات.
