دارت سلطات مدينة طنجة، اليوم الثلاثاء، حملة على مواقف السيارات(الپاركينغ) العشوائية بوسط المدينة، وكان تم توقيف عدد من الحراس اللي معندهمش الرخصة.
ووفق مصادر مقربة، فإن قائد الملحقة الإدارية الرابعة بجانب المخازنية وعناصر من الدائرة الأمنية الثانية، دارو حملات بمواقف الطوموبيلات شادينها مجهولين على أراضي ديال الملك الخاص.
وحسب نفس المصادر، فإن هاد الحملة جات من بعد بزاف ديال شكايات لأصحاب الأراضي بوسط المدينة، كيتشكاو من احتلال مجهولين وصحاب السوابق لأراضيهم واستخدامها ك”پاركينغ”.
ووفق نفس الشكايات، فإن المستغلين ديال هاد المواقف، كيروجو مختلف أنواع المخدرات وبيع الكحول فظروف ماشي صحية.
وعلى إثر العملية، تم توقيف مجموعة من منتحلي صفة حراس السيارات (الكارديانات) بلا رخصة من طرف مقاطعة المنطقة، وإيداع الطوموبيلات في المحجز الجماعي.
وحسب نفس المصادر، فإن هاد الحملة، جات تحت إشراف والي جهة الشمال محمد مهيدية، بتنسيق مع السلطات الأمنية.