وقفو البوليس ديال إسبانيا نهار الثلاثاء الفايت، عائلة مغربية – بلجيكية على المعبر البري بين المغرب وسبتة المحتلة، بسباب محاولة تهريب 65 كيلوغرام من المخدرات، كانت مخبية مع الحوايج ديال السفر داخل طوموبيلتهم.
ووفق الشرطة الإسبانية، فإن عصابات تهريب المخدرات كتستاغل فترة الرجوع من العطلة باش يهربو المخدرات إلى أوروبا.
وقبل جوج سيمانات، وقفو البوليس الإسباني، نهار الأحد الفايت، 2 عائلات مغربية في مدينة سبتة المحتلة بتهمة تهريب المخدرات. وأفادت المصادر باللي العائلتين المغربيتين، كانو راجعين لبلجيكا فميناء سبتة، بعدما دوزو العطلة الصيفية فالمغرب.
وزاد المصدر نفسو، باللي العائلتين المغربيتين معاهم ثمنية أطفال قاصرين، تتراوح أعمارهم بين 1 و15 عام، وتمت مصادرة أكثر من 200 كيلوغرام من المخدرات، مخبية داخل 2 ديال الطوموبيلات (سيتروين بيكاسو) و (بيجو 500) مسجلة ب”ماتريكيلات” بلجيكية.
وعطى قاضي التحقيق بمحكمة سبتة أوامر باش يتوضعو أرباب الأسرتين رهن الحبس الاحتياطي، بسجن مينديزابال فانتظار المحاكمة، مع إخلاء سبيل الزوجتين، وإحالة القاصرين الثمانية على مركز متخصص في رعاية القاصرين بالمدينة، بسباب عدم توفر قريب بالغ اللي غيقابلهم.
