كتعيش ساكنة المدينة القديمة، بالدار البيضاء بالضبط، معاناة من زمن طويل مع السكن الهش والفقر اللي مهمّش وغير لائق لدرجة كبيرة، والناس تماك كيتألّمو في صمت.
وفي ظل الظروف اللي كتعيشها المملكة جرّاء “زلزال الحوز” اللي ضرب نهار الجمعة الفايت 08 شتنبر، الشيء اللي خلى بزاف ديال الديور فالمدينة القديمة اللي أصلا واكلة الدق تزيد تضرر مرة أخرى ولقدر الله مآلها الهدم ولا السقوط..هادشي حرك السلطات اللي بدروهم دارو حملة على ساكنة المدينة القديمة وأمروهم باش يخرجو من ديورهم فأقرب وقت ممكن ويحطو مبلغ قدره 12 مليون سنتيم باش يستافدو من بقع أرضية.
السي حمد.س، واحد من ساكنة المدينة القديمة ومن الناس اللي معرضين للإفراغ.انتقل طاقم فلاش راديو للدار ديالو وجرى معاه حوار على المشكل اللي كيواجهو فيما يخص السكن، حيث عبر بحرقة وألم على الحالة المزرية اللي كيعيشها رفقة الأسرة ديالو .
وذكر لينا نفس المتحدث أن السلطات علموه باش يخرج من دارو ويوجد المبلغ اللي ذكرنا سالفا، باش يستافد من بقع أرضية، لكن في ظل الظروف الصعيبة اللي كيمر منها، صعيب يلقى تخريجة لهاد الأزمة، وكيفما جا على لسانو “كيغاندير حتى نجمع مبلغ ديال 12 مليون سنتيم كامل، وانا من 2012 ولغات تجمع ليا حتى ألف درهم، وحتى خدمتي ممستاقراش مرة نبريكولي مرة لا..وحتى من الماكلة نقدر نبات أنا ووليداتي بلا عشا”.
وناشد نفس المتحدث صاحب الجلالة الملك محمد السادس باش يشوف من حالو الضعيفة.
غتلقاو رابط الفيديو ديال قصة “السي حمد” أسفله:
