كتعيش بزّاف ديال الأسـر بكل من درب أقا ودرب الملاح ودرب أحفير وغيرها من ساكنة الدور الطينية بتارودانت، خطـر ديورهم اللي آيلة للسقوط واللي تعرّضات لتشققات كبيرة وخطيرة خلاّتهم يخرجو دغية للشارع والإستقرار في خيام بلاستيكية خوفا من تعرض منازلهم للإنهيار بسباب الهزّات الارتدادية اللي كتواجهها المنطقة.
السلطات كانت حدّدات عددا من الدّيور المهددة بالإنهيار وعلّقات فيها لافتة تحمل عبارة “مبنى آيـل للسقوط ممنوع المرور “، فالوقت اللي مازال مجموعة منهم كيتسنّاو لجان السلطات المحلية، لتقييم الضرر اللي ضرب باقي الدّيور.
سـعيد واحد من المتضررين واللي تعرّضات دارهم بدرب أحفير لشقوق خطيرة سبّبات الرعب والخوف فالساكنة.
الدّار كتكوّن من مبنى ترابي مقسم لجوج طوابق ، طابق أرضي مقسم لجزئين بغرف ضيقة المساحة وباحة صغيرة، وطابق أول بغرفتين، كيبان فالحيط ديالو شقوق واسعة وخطيرة.
وقال، باللي السلطات كانت أحصت المنازل المهددة بالسقوط بالمنطقة، غير أنه على مكيبان موصلتش نوبتو فالمعاينة لحدود الساعة باش يتم السماح ليهم بإعادة الإصلاح ولا الإستفادة من التعويض، وفق تعبير المتحدث.
مـي فاطمـة” اللي فالستينات من العمرديالها، مازال مخلوعة من رجوع الهزات الإرتدادية اللي سبّبات ليها الرعب والخوف، وخلاوها مقيّدة حدّها باب الدّار اللي لجئت ليه هي وأحفادها للمبيت والعيش، منذ اليوم الموالي للهزة القوية ليلة الثامن من شتنبر .
وبعد تبين استحالة الرجوع ليه،-وفق تعبير مي فاطـمة- بتوصية من السلطات المحلية اللي شرفات رفقة خبراء وتقنيين على المعاينة المباشرة للمنزل خلال السيمانة الفايتة، وحذّرات من الإقتراب منّو والمرور بمحاداة جدرانه اللي كتميل لواجهة المنزل.
