رفض أعضاء حزب العدالة والتنمية بمجلس جهة الرباط، التصويت على مَشروع اتفاقية كتّعلق بإنجاز مشروع الرباط المَدينة الذكية، بسباب كتابتها باللغة الفرنسية.
وعلّل بهاء الدين أكدي، رئيس مجموعة العدالة والتنمية بالمجلس، الامتناع عن التصويت بقوله “سبق ونبّهنا رئاسة المجلس بتفادي كتابة مشاريع الاتفاقيات باللغة الفرنسية، والتازم رئيس المجلس بعدم تكرار داكشي، وهو الشيء اللي اعتبرناه ديك الساعة مجرد استثناء ومغيتعاودش مرة أخرى”.
وضاف “أكدي”، باللي “التكرار ديال داكشي فهاد الدورة كيتجاهل هاد الالتزام وكيتجاهل حتى السياق اللي كتعرفو علاقة بلادنا بلغة دولة فرنسا”.
وعلن المستشار الجماعي، على امتناع أعضاء الحزب ديالو على التصويت على هاد الاتفاقية فهاد الدورة والامتناع على التصويت فالدورات المقبلة على أي مشروع اتفاقية مكتوبة باللغة الفرنسية.
وجدير بالذكر باللي هاد المشروع اللي كتأطرو هاد الاتفاقية واصلة كلفته الإجمالية ل390 مليون درهم، وهي الاتفاقية اللي صادق عليها مجلس الجهة أمس الإثنين في الدورة ديالو العادية لشهر يوليوز الجاري وامتانع على التصويت أعضاء العدالة والتنمية.
وكيساهم فهاد المشروع مجلس جهة الرباط بمبلغ 60 مليون درهم، في حين كتساهم وزارة الانتقال الرقمي وإصلاح الإدارة بمبلغ 300 مليون درهم.
وكتوصل المساهمة المالية للوكالة الوطنية للسلامة الطرقية التابعة لوزارة النقل واللوجستيك 30 مليون درهم.