كشف التقرير السنوي لبنك المغرب حول الظرفية الاقتصادية والنقدية والمالية باللي قيمة الموجودات من الذهب طلعات، برسم عام 2022، لما يقارب 13,5 مليار درهم، بارتفاع النسبة ديالو 12 فالمية.
ووضح بنك المغرب فهاد التقرير أن هاد التطور كيرجع للتأثير المزدوج لطلوع أسعار الذهب (المحدد بالدولار) وهبوط الدرهم مقابل الدولار، كيضيف أن كمية الذهب بالأونصة كتبقى مستقرة، من عام لآخر، عند 711.032 أونصة (أي ما كيعادل 22 طن).
وضاف نفس المصدر أنه، من نهاية عام 2006، كيتم تقييم الموجودات من الذهب المحفوظة بالمغرب وعند الأمناء الأجانب وكذا توظيفات الذهب المنجزة مع الجهات المقابلة بسعر السوق.
وجدير بالذكر أن الأرباح والخسارات اللي تحققو من بعد هاد العملية تحمل لتقييم احتياطات الصرف، وداكشي حسب مقتضيات الاتفاقية المنظمة لهاد الحساب المبرمة بتاريخ فاتح نونبر 2022 بين بنك المغرب ووزارة الاقتصاد والمالية.
وزيادة على داكشي، وضح التقرير أن الموجودات والتوظيفات بالعملات الأجنبية طلعات فنهاية 2022 بنسبة 7 فالمية ل318,87 مليار درهم، بالنظر أساسا لتأثير الصرف الإيجابي المتعلق بتراجع الدرهم.
وكتمثل الموجودات من العملات الأجنبية 64 فالمية من أصول البنك المركزي، وكيتم استثمارها في حدود 81 فالمية فالسندات. وفإطار هاد الفئة، ارتفعات محفظة سندات الاستثمار بنسبة 18 فالمية باش توصل 189,21 مليار درهم، بعد ما تم استئناف التوظيفات على مستوى هاد المحفظة خلال الفصل الثاني من العام.
ومن جهة أخرى تراجعات المحفظة المخصصة لرسوم التوظيفات بنسبة 14 فالمية ل68,15 مليار درهم.
وفي ما يتعلق بالإيداعات والتوظيفات النقدية، عرفات نمو بنسبة 2 فالمية ل34,98 مليار درهم، لتمثل بذلك 11 فالمية من الموجودات والتوظيفات بالعملات الأجنبية.