هبط حجم منتوجات الصيد البحري الساحلي والتقليدي المفرغة فالموانئ المغربية فالشطر اللول من عام 2023، بنسبة 19- فالمية،محققا بداكشي 522.814 طن، وهادشي حسب معطيات بيّناتها وزارة التجهيز والماء.
وذكرات الوزارة المذكورة، باللي الرواج العامّ على مستوى الموانئ المغربية برسم الفصل اللول من سنة 2023، وصل ل100,9 مليون طن مقابل 101,3 مليون طن فنفس المدّة من العام الفايت، بمعنى كاين انخفاض قليل وصل ل0,4-فالمية.
كيفما وضّحات الوزارة في بلاغ ليها، باللي الرواج الوطني (بلا احتساب الوقوف ديال الباطو)، عرف تسجيل حجم عامّ كيقارب 53,8 مليون طن (5,8-فالمية)، بينما نشاط “المسافنة” عرف رواج وصل الحجم ديالو 47,1 مليون طن مع زيادة النسبة ديالها ب6,6+فالمية بالمقارنة بالشطر اللول من عام2022.
ووفق نفس المصدر، حقّق نشاط المسافنة نسبة هامة تقدر ب46,7% من حجم الرواج المينائي الإجمالي فالشطر اللول من عام 2023، كتجي وراه الواردات بنسبة 32,1% واللي سجّلات 32,3 مليون طن (8-%)، والصادرات بنسبة 16,7% واللي وصلات ل16,8 مليون طن (3,5-%)، ورواج المساحلة بنسبة 3,8% واللي عرف ارتفاع القدر ديالو 6,7+% وسجّل حجم القدر دذيالو 3,8 مليون طن، وكايجي فاللخر نشاط تزويد الباطوّات بالبنزين بنسبة 0,8% اللي وصل ل0,8 مليون طن (14,8-%) وداكشي بتزويد الباطوّات اللي دايزة على مضيق جبل طارق.
وفيما كيتعلّق بأبرز الأروجة الاستراتيجية للموانئ المغربية فالفصل اللّول من عام 2023، حيث عرفات ارتفاع كل من رواج “الكُونْطُنِيرَاتْ” (4,8 مليون كُونْطُنِير من فئة 20 قدم /6,9+%) والكوك البترولي (0,6 مليون طن / 57,4+%) والنقل الطرقي الدولي (280.745 وحدة / 2+%) والعربات الجديدة (321.267 وحدة / 15,8+%) من جهة، وانخفاض كل من رواج المحروقات المستوردة (5,7 مليون طن/ 3,4-%) والحبوب (4,2 مليون طن/ 13,9-%) والفاخر(5,1 مليون طن/ 13,7-%) والفوسفاط والمنتجات المراتبطة بيه (11 مليون طن/ 24,6-%) من جهة أخرى، وفق البلاغ.
وبيّن البلاغ، أن بالنسبة لرواج المسافرين، فقد سجّلات موانئ المملكة 1,4 مليون مسافر فالشطر اللّول من عام 2023، بمعنى ارتفاع ملحوظ وصلات النسبة 128,5+% مقارنة مع نفس المدّة من العام الفارط. كيفما عرف رواج السياح البحريين بداية الحركة، وبالتالي سجلات الموانئ 149.929 سائح بحري.