البطولة ما بقا لها والو وتنطلق وأغلبية ديال الفراقي ما عارفين أشنو يديرو، كاينين الفراقي لي بلا رؤساء نموذج ديال أولمبيك أسفي ومولودية وجدة، وكاينين فراقي آخرين باقين كيقلبوا كيفاش غادين يتعاملوا مع المشكل ديال المنع من الانتدابات.
دابة هاد الفراقي لي تكلمنا عليهم راهم فالقسم الأول ديال البطولة الاحترافية، أما القسم الثاني راه مشاكل كبيرة واقعة، وكاين لي باقي ما تعاقدش لا مع مدرب لا مع لعابة.
راه فوزي لقجع كلف العصبة الاحترافية باش هيا لي تشرف على تسيير وتدبير البطولة فالقسم ديالها الأول والثاني، لكن المسؤولين ديال هاد العصبة لي كيترأسها رئيس الشركة الرياضية لنهضة الزمامرة، عبد السلام بلقشور، وهاد العصبة لي فيها أعضاء يا إما عندهم مشاكل فالأندية ديالهم يإما استاقلوا من التسيير، وهاد الأمر ينطبق على هشام أيت منا لي غرق الفرقة ديالو بالديون، ورضوان الغازي لي فشل فتسيير المغرب التطواني واستاقل من الرئاسة، وزيد عليهم خالد المغافري لي الدور ديالو باقي ما عارفينوش بالضبط أشنو هو، واخا عارفينو كاتب عام ديال العصبة الاحترافية لكن كنشوفوه غير مرة مرة.
راه كيبان هاد العام البطولة المغربية غادة تبدا ضعيفة، والعصبة زربات بزاف باش دارت الانطلاقة ديال الدوري في 25 غشت، والأغلبية ديال الفراقي مازال كيتخبطوا فالمشاكل، وفكها يا من وحلتيها.
العصبة الاحترافية لي كيترأسها عبد السلام بلقشور غادي ينطبق عليها المثل لي كيقول “باك طاح قالبه من الخيمة خرج مايل “.