لجأت عائلة الطفلة هدى اللي ساكنة فإقليم سيدي بنور، اللي تصابت بمرض تعرّضات بسبابو لشلل أو ولاّت غير قادرة على المشي زائد أعراض صحية أخرى، لتقديم شكاية مؤخرا ل”خالد آيت طالب”، وزير الصحة والحماية الاجتماعية، باش يطالبو بالتعويض على الضرر اللي لحق ببنتهم بعد تلقي اللقاح المضاد لفيروس “كوفيد 19”.
أب الطفلة، اللي فعمرها 15 عام، أكد،لمصادر صحفية مقربّة باللي بنتو كتستافد من خدمات التعليم المدرسي كيفما سبق أو واعدو بداكشي مسؤولين تربويّين، حيث كيوفّرو ليها النقل من وللمدرسة لتيسير متابعتها للدراسة؛ غير أنها مستافداتش من حتى متابعة طبية، وفق كلامو.
وبيّن نفس المتحدث باللي بنتو كتعاني من مرض “GUILLON BARRE” الناتج بعد جرعة ثانية من لقاح “سينوفارم” المضاد لفيروس “كوفيد 19″، مباشرة بتاريخ 2021/09/20، مشيرا إلى أنه دار بزاف ديال المحاولات باش يتوصّل للعلاج؛ ومن بينها الاستشفاء فصبيطار ابن سينا للأطفال بالرباط.
وزاد أنه تم الإبلاغ على الحالة ديالها لدى وزارة الصحة والحماية الاجتماعية بلا تلقّي حتّى جواب فالموضوع، كيوضّح باللّي الوضعية الاجتماعية ديال عائلتو ضعيفة؛ بالنظر لخدمتو اللي على قدّ الحال فالفلاحة.
وكتب المتحدث نفسو ضمن الشكاية : “كنلتاجأ ليكم بهاد الشكاية لمد يد المساعدة والوقوف مع بنتي اللي وللات كتعاني جسديا، وهو الشيء اللي مخلّي أثر نفسي عليها ، داكشي علاش هي في محتاجة لدعم مادي ومعنوي”.
وأشار والد الطفلة هدى إلى أن اللقاح تفرض على بنتو من طرف الإعدادية اللي كتقرى فيها، فإطار الحملة الوطنية للتلقيح ضد فيروس كورونا، ومن وراها ديريكت حسّات بفشل فرجيلها، تحول لشلل بعد ما دازت 3 أشهر، زيد عليها خلل فالجهاز البولي كيمنعها من التبول بشكل طبيعي.
من جهة أخرى، ناشد المتحدث الهيئات المدنية باش يساعدوه من أجل مواكبة ابنتو اللي كتخضع للترويض الطبي اللي متحسّناتش بزاف حالتها الصحية، كيطالب الوزارة باش تحمل مسؤولية علاج الطفلة، كيأكد أن كاع الوثائق اللي كيتوفر عليها تثبت باللي الطفلة مصابة بمرض بان بسباب اللقاح.