عاشت ساكنة دوار آيت ماعلا بتيزي نتاست اقليم تارودانت هزة ارتدادية وقعات فالساعة السادسة من اليوم الخميس 14 شتنبر.
وقال محمد، من ساكنة الدوار لمصادر مقرّبة، باللي الهزة حسّساتهم بالخوف، بحيث مدازش على الهزة القوية اللي عرفاتها المنطقة وقت طويل حتى رجعات هد الهزة باش تركّب الرعب فيهم.
من جهتو، قال عمر، وبدوره من ساكنة المنطقة، أنه كان فهاديك اللحظة كيوجد برّاد ديال أتاي حتى سمع حركة بحال الهزة القوية اللي ضربات المنطقة في ليلة 8 شتنبر الفايت.
وعرف إقليم الحوز هزات ارتدادية تّعتابرات الأقوى فالمنطقة من الهزة الأولى الفتّاكة، ليلة الجمعة الفايتة.
الهزة اللولى كانت فالساعة السادسة و53 دقيقة من صباح اليوم، وقرّبات قوتها ل4,8 درجة على سلم ريشتر حسب المدبر المعهد الوطني للجيوفيزياء، ناصر جابور
وحسب خدمات تعقّب الزلازل بغوغل مابس، سجّلات الهزة ثانية حوالي الساعة التاسعة ديال الصباح.
وخلقات الهزات حالة هلع بين السكان في دائرة أمزميز والدواوير التابعة ليها، كيفما تسببات في سقوط شي ديور اللي كانت متشتّتة بفعل الهزة اللولى، في حين متمّش لحد الساعة الإبلاغ على وجود ضحايا جداد.
وبه، جدّدات فرق الوقاية المدنية والسلطات المحلية دعوتها للمواطنين بعدم الإقتراب من بناياتهم اللي فيها الضرر، كيفما طالباتهم بنصب الخيام بعيد على هاد الديور وحتى المنحدرات اللي ممكن تعرف تساقط للأحجار من المرتفعات الجبلية.
