ذكر المخرج الأمريكي مارتن سكورسيزي، في مقطع فيديو نشرو، اليوم الجمعة، 22 شتنبر 2023، عبر حسابه الخاص على منصة “إنستغرام”، أنه حزن بقوة، بحال ملايين الناس فالعالم، بعد ما سمع خبر الزلزال الفتّاك اللي طرى فالمغرب ودمر بزّاف ديال الديور وأودى بحياة المئات من الأرواح.
وأكد المخرج العالمي أنه صعيب عليه التعبير اليوم على داكشي اللي حسّ بيه، بالأخص أن المسألة شخصية بالنسبة ليه كمخرج صور جوج ديال الأفلام فالمغرب وزار مراكش بمناسبة مهرجانها الدولي للفيلم بزاف ديال المرات، كيفما حل بالمملكة في مناسبات مختالفة، الشيء اللي خلاّه يبغي هاد البلد بقوّة.
وعلن سكورسيزي على دعمو وتضامنو للمغرب موطنه الثاني، وأضاف : كنشارككم أحزانكم، وكندعي معاكم.
وختم سكورسيزي رسالتو بالقول : أنا متوشق للحظة رجوعي للمكان اللي كنبغيه بزّاف. (يعني المغرب).
وكان المخرج الأمريكي الكبير مارتن سكورسيزي، المدافع على السينما، وواحد من أكثر الفنانين تأثير فالعالم لأكثر من 40 عام، واللي دعم من فترة طويلة المهرجان الدولي للفيلم بمراكش اللي حضر فعالياتو 5 المرّات، أكد رجوعو ليه مرة أخرى.
وفهاد الصّدد، وافق سكورسيزي باش يكون عراب النسخة السادسة ل”ورشات الأطلس”، البرنامج المهني المخصص لمواهب الجهة. وغيكون بالتالي أول شخصية كبيرة تمت دعوتها لرعاية دورة الورشات وعطى سميّتو لدفعة الخريجين حسب ما أوردته الشركة الوطنية للاذاعة والتلفزة.