مرة أخرى كيبان أن وليد الركراكي عندو مشكل مع المحترف المغربي بالدوري الإماراتي سفيان راحيمي ومازال ماناويش يستدعيه للمنتخب المغربي.
سي وليد المنتخب ماشي ديالك باش تبدا تدير لنا فيها عنتر زمانك، والنتيجة لي حققنا فمونديال قطر راه بزاف ديال العوامل كانت مساهمة فيها، بداية من الرؤية الملكية المتبصرة لتطوير الرياضة بصفة عامة وكرة القدم بصفة خاصة، وأيضا الدور لي كيقوم به رئيس الجامعة الملكية المغربية فوزي لقجع في الحفاظ على روح المجموعة داخل المنتخب وهو لي دائما قريب منهم، والجماهير المغربية التي كانت سندا كبيرا للاعبين خلال المونديال، واللاعبين لي كانت عندهم رغبة باش يتقاتلو في سبيل إسعاد الشعب المغربي.
وبالعودة إلى ملف سفيان راحيمي، ياك في الندوة لي علنت فيها عن اللائحة ديال اللعابة لي غادين يمشيو للمونديال، وحيدتي منها لاعبين ساهموا في تأهل المنتخب إلى المونديال مع خاليلوزيتش لي بالمناسبة ما خصناش نساو الفضل ديالو في بعض الأمور لي كانت حتا هيا سبب فالتألق بالمونديال، وكنت قلت بأن راحيمي غادي نحتاجو في منافسات كأس افريقيا، هو والعديد من اللاعبين، ولكن لحدود الساعة باقي راحيمي ما داخلش في المخطط ديالك.
راه المنتخب ديال المغاربة كاملين وناس كيفهمو للكرة كيقولو لك أسي وليد أن راحيمي بلاصتو كاينة.
كأس افريقيا راها جاية وننتظر لمستك ونتمنى لك النجاح في مهمتك، لكن أن تقصي لاعب بدون مبرر وهو المتألق رفقة فريقه بالدوري الإماراتي، يجعلنا نضع سؤالا بالخط العريض “أش واقع بينك وبين راحيمي”؟