حوار افتراضي دار بين مسؤولين سياسي ورياضي.
آلو السلام عليكم السيد الرئيس .
عليكم السلام سيدي الرئيس.
دابا قول ليا شكون اللي رئيس فينا ..
لا انت الرئيس الفعلي اسيدي ..
وخا اسيدي جي عندي للمكتب كين اجتماع طارئ
ياك لاباس اسيدي
لا والو باس غير نتفاهمو على واحد لبلان فهاد الشي ديال الكرة..
صافي اسيدي انا معاك دابا …
بعد ساعات قليلة ..
اهلا السيد الرئيس اش اخبارك كلشي مزيان ..
لا والو مامزيان ماوالو القضية صعيبة بدينا بدية قاسحة الجفاف الحرب كورونا كلشي غلا في السوق والناس نايضين لينا بالاحتجاجات..
ايو اش المعمول اسيدي.
من عندك اسي الرئيس انت راك زعما حريفي وشديد اشنو بان ليك نرجعو الدراري للتيرانات يتلاهاو شوية ويقلبوا علينا
هههه فكرة مزيانة ولكن را اغلب الناس ديال الكرة ماعندهمش بطاقة التلقيح..
صافي بلاش اشنو بغاو هاد البطاقة ديال التلقيح اصلا ياك هوما غادين غير يتفرجو وينشطو وينساو الهموم صافي خليهم يدخلو للتيران ..
ولكن اسي الرئيس اشنو غنديرو مع الصحافة
مال الصحافة
غادين يهضرو على التباعد والكمامات وجواز التلقيح .
لا لا متخافش ياك انت عندك صحافة ديالك
اه عندي شي بركة
حتى انا عندي صحافة ديالي كثيرة كاع تا واحد مغادي يهضر على الموضوع بالعكس كلشي غادي يعجبو الحال فاش يشوف التيرانات عامرين.
وقول ليا وهاديك اللجنة العلمية هانية على حسابك
ويلي حتى انت .ماكين لا لجنة علمية ولا والو غير لخبار فراسك وصافي اصلا هاد كورونا راه غير فيلم عالمي مثلنا فيه كاملين وكلشي خدا نصيبو بما بان شي فيلم جديد..
هههههه والله حتى راك واعر اسي رئيس
ايوا اشنو اللعب هذا.
المهم انا غادي نعلم مالين الفراقي باش يعلمو المخزن
كيفاش المخزن رحنا هوما المخزن اسي الرئيس…
ههههه وخى شوية التصاور وصافي
هههه راك عفريت اكثر مني …
قلنا اللهم نرجعو الدراري للتيرانات ولا يبقاو كل نهار الاحد يخرجو للشارع يصدعونا على الزيادة والغلاء ووووالخ
لالا كون هاني نسى عليك هاد الموضوع كلشي غادي يرجع للتيران يفرح وينشط ويتلاها مع المدرب الحكم واللعابة ولكلاشات بيناتهم
ههه داك الشي اللي بغينا بما قرب رمضان ونحلو ليهم الجامع بالليل عاود ثاني يدوزو الوقت مع التراوح والسيلفيات وداك الشي ..
صافي كون هاني غدا انا معاك …
وفعلا ذلك ماتم بشكل كبير وكل تشابه في الحكي هو من قبل الصدفة والله يسمح ليا ..
