تعرّض واحد السيد بريطاني فعمرو 48 عام، لعدوى بكتيرية مكانتش معروفة من قبل، بعدما عضّاتو مشّة.
ومشى السيد ديريكت للصّبيطار من بعد الإصابة، وبدات يدّيه كتّنفخ وبانت أثار الجروح فالمعصم ديالو.
وجا على لسان الطبيب نيك جونز، من مستشفيات جامعة كامبريدج: “المشاش هو المنبع الرئيسي للعدوى الحيوانية المنشأ، سنانهم الطّوال كتوصل للأنسجة العميقة ولعابهم كيضاعف من مخاطر الإصابة بالعدوى”.
خرج الرجل من الصبيطار بعدما تمّ تنظيف جروحو وتضميدها، لكن صبعانو بقات كتّنفخ بطريقة موجعة.
ورجع فالنهار اللي بعدو، وعطاوه الأطباء 3 ديال الأنواع من المضادات الحيوية(أونتيبيوتيك) وخذاو شي أنسجة باش يديرو ليها التحليل.
واكتاشفو باللي الحالة ناتجة على بكتيريا كتشبه شيئا ما المكورات العقدية اللي كتسبّب التهابات بحال التهاب السحايا والتهاب الحلق والالتهاب الرئوي الجرثومي والعين الوردية.
ومع التحليل لقاو أنها كتنتامي لعائلة بكتيريا كتّسمى”globicatella”، اللي من الممكن باش تقاوم عدة أشكال من المضادات الحيوية.
وقال جونز: “كتسلّط الحالة الضوء على دور المشاش كمصدر لأنواع بكتيرية مازال متّكتاشفاتش لحدّ السّاعة”.