شرعات المصلحة الولائية للشرطة القضائية بمراكش في فتح بحث قضائي تحت إشراف النيابة العامة المختصة، مساء أمس الثلاثاء، وهادشي لتحديد ظروف وملابسات محاولة سرقة بالخطف نتج عليها حادثة سير بخسائر مادية وبشرية.
وحسب لبلاغ صادر عن المديرية العامة للأمن الوطني، فإن المعطيات الأولية للبحث كتشير بأن ارتكاب سائق دراجة نارية لسرقة بالخطف استهدفت الحقيبة اليدوية لسائقة سيارة خفيفة كانت غادية على مستوى الطريق المداري فاتجاه منطقة المحاميد بمراكش، واللي حاولات بدورها تهرب ما أمكن من المشتبه فيه وبالتالي فقدات السيطرة على الطوموبيل، اللي تقلبات بعد ما ضربات المعني بالأمر وبائع متجول مع ولدو القاصر كانو في قارعة الطريق.
كيفما أورد المصدر نفسو، أن هاد الحادثة نتجات على تعرض سائقة السيارة ووالدتها والمشتبه فيه والطفل القاصر لجروح متفاوتة الخطورة، نقلوا على إثرها للمستشفى باش يتلقاو العلاجات اللازمة، وهي نفس المؤسسة الصحية اللي تنقل ليها الضحية الرابع اللي كيخدم بائع متجول، والي وافته المنية لحظة وصوله لقسم المستعجلات.
ومازال الأبحاث الي كتجريها المصلحة الولائية للشرطة القضائية بمراكش مستمرّة، واللي كتشمل استغلال جميع مسارات البحث الميدانية والتقنية، زيادة على تحصيل إفادات جميع الشهود، بغرض تحديد ظروف وملابسات هاد القضية بشكل دقيق وشامل.